★ اضرار الحلزون الافريقي العملاق ★

Achatina fulica...الاسم العلمي

 لاحظت ان الناس مش فاهمة اضرار الحلزون علي الطبيعة ف حبيت اتكلم في النقطة دي شوية

....................................................................................

الحلزون الافريقي العملاق يعتبر من اخطر الافات الضارة اللي بتهدد المحاصيل ( من ناحية انو ياكلها و من ناحية انو ينقلها امراض ) و محظور في دول كتير جدا في اوروبا حد سأل نفسو ليه ؟

ببساطة كده علشان الحلزون بيبلغ بسرعة و بيبدا يتكاثر بعد شهور قليلة من عمره و بيبيض كتير جدا و حجمة بيكبر زي ما باين في الصور

معني الكلام ده انو لو تواجد في الطبيعة هتبقا كارثة بيئية
تخيل معايه كده حلزون ب الحجم ده و بيتكاثر بسرعة و بيبيض كتير و اهم حاجة ان الحلزون ده ملهوش مفترسات كتير و بالذات لو كبر يعني من الاخر مفيش حاجة هتقدر تاكله....طب تخيل لو تواجد في ارض زراعية عندنا في مصر هيحصل ايه ؟؟ زود عندك كمان ان الحلزون ملهوش طرق ابادة و المبيدات بتاعت الزرع و الحشرات مش هتشكلو اي ضرر لدرجة ان في دول افريقي بتحرق المحاصيل علشان تتخلص منو و بردو بيفضل موجود...و كمان في دول في افريقيا بقيت تاكل الحلزون علشان بقا موجود بكثرة

....................................................................................

الحلزون بيستخرج منو مادة الكولاجين و مع الوقت انتشر موضوع ان الحلزون يتحط علي الوش علشان مفيد للبشرة....مش هقول ان ده غلط لا هو صح فعلا مفيد للبشرة بس مش بالطريقة اللي الناس فهمتها... يعني مثلا قبل ما تشتري حلزونات ب ٣٠٠ او اكتر علشان وشك فكرتي شويه انك ممكن تجيبي كريم للبشرة ب سعر اقل من كده و هيبقا مفيد اكتر من ١٠٠ حلزون !! لما تحطي حلزون افريقي علي وشك مش هيخليكي سكارليت جوهانسون 😅🌚 بالعكس انتي كده بتخلي التجار تنتج اكتر و هتتسببي في ضرر البيئة المصرية في المستقبل القريب

....................................................................................

موضوع ان الحلزون يهرب من حد بالغلط او حد مش فاهم يسيبو في الطبيعة ده مش من وحي الخيال لا ده حصل في دول كتير جدا و حصل في الولايات المتحدة و لسه لحد دلوقتي بيحاولو يبيدو الحلزون مش عارفين

★ احنا ك هواه و ناس مهتمة ب البيئة المصرية بنقول بلاش انتاج حلزون عمال علي بطال الموضوع مش شطارة خالص و مش هتبقا شخص مميز لو انتجت حلزون بالعكس ده انتاجه سهل جدا...نعمل ايه علشان نقلل الانتاج ؟ ببساطة كده ربي الحلزون منفرد يعني كل حلزون في علبة لوحده و بنقول للتجار يخفو من انتاج النوع ده شويه علشان كتر جدا في مصر و بقا اوڤر اوي....شوف عدد الحلزونات في مصر بقا اد ايه دلوقتي و افتكر كده من ٣ سنين كان العدد اد ايه

طب تخيل معايه بعد ٥ سنين من دلوقتي هيبقا اد ايه !!
لو قدرت تتخيل النقطة دي انت لوحدك هتفهم ان الحلزون مضر و هيتسبب في هلاك المحاصيل الزراعية و هيحصل مجاعات في المستقبل القريب

انت مش اسبونج بوب يا حبيبي عشان تربي حلزون 🐌🐌